عكاز وكام خطوة مش محسوبة
ورعشة إيد ودعوة لرب مش مردودة.
وكام كلمة بحروف تايهة مش مفهومة
وحنية ضهر من أيام مهيش مفرودة
خطوط كترت في كل مكان ..
بتحكي حكاية من أزمان
لطفلة وشابة وفي شيبة ..
وواخدة من الإله طيبة
لقيت عمري علي وشك
مجرد يا امه. تجعيدة.....
عكاز بيحبي معاك م الأول
كإنك طفلة مولودة .. يميل بيك .. يقع بيك. .. لكنك لسه موجودة
مفيش غيره ال باقي معاك
بيسمعلك.. بقي شبهك.. بقي حكايتك وموالك ..
بيعمل ذكريات وياك .. عشان في بكرة يحكيها .. وتبقي أحلي حدوته
أنا العكاز ال في إيديك..
أنا ساندك وأنا سندك. ..
عشان حبك ...
أنا ال عمري بعيشه تحت رجليك
أنا سرك .. وأنا سترك
أنا ال كونه ما يسوي دمعة متحاشة في عنيك ...
انت يا امه بنتي وامي .
وانا عكازك طول ما روحك لسه موجودة
و هحبي معاك م الأول كإنك لسه مولودة
إرسال تعليق